Կրկնեք բազմապատկման աղյուսակը։
Սիրելի սովորողներ, հայտարարում եմ ընտանեկան ֆլեշմոբ։ <<Ընտանեկան նախագիծ․ Թթուդրիկն ու մաթեմատիկան>> նախագծի շրջանակներում ձեր ընատնիքի անդամների հետ միասին թթուդրիկ կազմակերպեք։ Բաղադրատոմսը ներկայացրեք հետաքրքիր խնդրի տեսքով։ Պատրաստեք տեսաֆիլմ կամ ֆոտոշարք։ Արդյունքները տեղադրեք բլոգում։
Օրինակ՝ 10 լիտր տարողությամբ տարայում թթու պատրաստելու համար անհրաժեշտ է 500 գ աղ։ Որքա՞ն աղ է անհրաժեշտ ՝
ա)1 լ տարողությամբ տարայում թթու պատրաստելու համար:
բ)3 լ տարողությամբ տարայում թթու պատրաստելու համար:
գ) 5 լ տարողությամբ տարայում թթու պատրաստելու համար:
Հոկտեմբեր ամսվա մաթեմատիկայի ֆլեշմոբի խնդիրների քննարկում։
1.Սովորողները նկարում էին Աթաբեկ Խնկոյանի հեքիաթները՝ «Ագռավն ու աղվեսը», «Ճպուռն ու մրջյունը», «Մկների ժողովը» և «Փեսացու մուկը»: Դասարանում 22 սովորող կար: Նրանց կեսը նկարում էր «Ագռավն ու աղվեսը», մյուս կեսից հինգը՝ «Ճպուռն ու մրջյունը», իսկ մնացածի կեսը՝ «Մկների ժողովը»: Քանի՞ հոգի էր նկարում «Փեսացու մուկը»:
2.Արփին ճաշի համար աղցան պատրաստեց: Մեկ բաժին աղցանի համար պետք է 3 լոլիկ, 2 վարունգ, 1 պղպեղ: Քանի՞ լոլիկ, վարունգ և պղպեղ օգտագործեց Արփին 8 բաժին աղցան պատրաստելու համար:
3.Պարկում կա 8 կարմիր, 4 դեղին և 11 կանաչ գնդակ: Առանց պարկի մեջ նայելու՝ ամենաքիչը քանի՞ գնդակ պետք է այնտեղից հանել, որ հանածներից գոնե մեկը դեղին լինի:
4.Տարբեր թվանշաններով գրվող ամենափոքր քառանիշ թվի հարյուրավորների կարգում ի՞նչ թվանշան է գրված:
5. Մեկ մուտք ունեցող բազմահարկ շենքի յուրաքանչյուր հարկում կա չորս բնակարան: Ո՞ր հարկում է 49-րդ բնակարանը, եթե բնակարանների համարակալումը սկսվում է առաջին հարկից` 1 համարով:
6.Մտապահած թվի կրկնապատիկին գումարեցին 6 և ստացան 90: Ո՞ր թիվն էին մտապահել:
7.Ագարակում ձմռանը նախապատրաստվելիս ձիերի համար գնեցին 76 տուկ խոտ: Տուկերը համարակալեցին. ամեն մեկի վրա փակցրեցին համապատասխան համարը: Քանի՞ անգամ օգտագործեցին 7 թվանշանը:
8.Պարտեզապուրակային աշխատանքից հետո տղաները հոգնել էին: Նրանք դպրոցի հյուրատանը երեկոյան՝ ժամը ութին, պառկեցին՝ քնելու: Տղաներից մեկը նախապես լարեց զարթուցիչը՝ հաջորդ օրը՝ առավոտյան՝ ժամը տասին արթնանալու և գործը շարունակելու համար: Քանի՞ ժամ կհասցնեն քնել տղաները, մինչև զարթուցիչն արթնացնի նրանց:
9.Օգտագործելով թվաբանական գործողության նշանները՝ հինգ մեկերի միջոցով ստացեք 100:
10. 2020 տարեթվի գրության մեջ օգտագործվում է իրարից տարբեր երկու թվանշան՝ զրոն և երկուսը: Հաջորդը ո՞ր տարեթիվն է, որի գրության մեջ նորից օգտագործվում են միայն զրո և երկու թվանշանները:
12.11․2020
Օրվա գործունեություն․
Բանավոր հաշվարկներ
Կրկնեք բազմապատկման աղյուսակը։
Թեմա՝ Պատիկ
Թվի պատիկ են այն թվերը, որոնք այդ թվի վրա բաժանվում են առանց մնացորդի։
Օրինակ՝ 2-ի պատիկ են այն թվերը, որոնք 2-ի բաժանվում են առանց մնացորդի։
Ստացվում է, որ բոլոր զույգ թվերը 2-ի պատիկ թվեր են, քանի որ բոլոր զույգ թվերը բաժանվում են 2-ի։
2-ի պատիկներն են՝ 2, 4,6,8,10,12,․․․։
Ստացվում է 2-ի պատիկներից ամենափոքրը 2-ն է։
Ցանկացած թվի միպատիկը գտնելու համար այն բազմապատկում ենք 1-ով։
Օրինակ՝ 5-ի միպատիկը կլինի՝ 5‧1=5-ը։
Ցանկացած թվի կրկնապատիկը գտնելու համար այն բազմապատկում ենք 2-ով։
Օրինակ՝ 5-ի կրկնապատիկը կլինի՝ 5‧2=10-ը։
Ցանկացած թվի եռապատիկը գտնելու համար այն բազմապատկում ենք 3-ով։
Օրինակ՝ 5-ի եռապատիկը կլինի՝ 5‧3=15-ը։
Ցանկացած թվի քառապատիկը գտնելու համար այն բազմապատկում ենք 4-ով։
Օրինակ՝ 5-ի քառապատիկը կլինի՝ 5‧4=20-ը
Ցանկացած թվի հնգապատիկը գտնելու համար այն բազմապատկում ենք 5-ով։
Օրինակ՝ 5-ի հնգապատիկը կլինի՝ 5‧5=25-ը։
Այսպիսով՝ 5-ի պատիկներն են՝ 5;10;15;20;25;․․․
Ինչպես նկատեցիք, 5-ի պատիկները կարելի է ստանալ նաև 5-ին հաջորդաբար 5 ավելացնելով՝
5,5+5=10, 10+5=15, 15+5=20, 20+5=25,…
5-ի ամենափոքր պատիկը 5-ն է։
Առաջադրանքներ․
- Գտիր 7-ի կրկնապատիկը։
- Գտիր 6-ի եռապատիկը։
- Գտիր 8-ի քառապատիկը։
- Գտիր 10-ի հնգապատիկը։
- Գտիր 4-ի տասնապատիկը։
- Թվարկիր 2-ի պատիկ մի քանի թիվ, որոնք փոքր են 20-ից։
- Թվարկիր 3-ի պատիկ մի քանի թիվ։ Ո՞րն է 3-ի պատիկ ամենափոքր թիվը։
- Գրեք 6-ի պատիկ մի քանի թիվ, որոնք փոքր են 54-ից։
- Գրեք 8-ի պատիկ մի քանի թիվ։ Ո՞րն է 8-ի պատիկ ամենափոքր թիվը։
- Թվարկիր 7-ի պատիկ մի քանի թիվ, որոնք մեծ են 30-ից։
- Թվարկիր 9-ի պատիկ մի քանի թիվ։ Ո՞րն է 9-ի պատիկ ամենափոքր թիվը։
- Թվարկիր 10-ի պատիկ մի քանի թիվ, որոնք փոքր են 70-ից։
- Թվարկիր 12-ի պատիկ մի քանի թիվ, որոնք մեծ են 24-ից։
- Գրեք 13-ի պատիկ մի քանի թիվ։ Ո՞րն է 13-ի պատիկ ամենափոքր թիվը։
- Ո՞րն է ամենափոքր երկնիշ թվի վեցապատիկը։
- Ո՞րն է ամենամեծ միանիշ թվի կրկնապատիկը։
- Ո՞րն է ամենափոքր եռանիշ թվի տասնապատիկը։
- Ո՞րն է ամենափոքր քառանիշ թվի քառապատիկը
ՌՈՒԲԵՆ ՇԱՀՎԵՐԴՅԱՆ 